ಬೆಂಗಳೂರು,ಏ,೧೩: ಗ್ರಾಮ ಪಂಚಾಯತ್ ಚುನಾವಣಾ ಪ್ರಕ್ರಿಯೆ ಪೂರ್ಣಗೊಂಡ ನಂತರ ರಾಜ್ಯ ಸರ್ಕಾರಿ ನೌಕರರ ಸಾಮೂಹಿಕ ವರ್ಗಾವಣೆ ನಡೆಸಲು ಸರ್ಕಾರ ತೀರ್ಮಾನಿಸಿದೆ.

ಗ್ರಾಮ ಪಂಚಾಯತ್‌ನ ಸಂಪೂರ್ಣ ಚುನಾವಣಾ ಪ್ರಕ್ರಿಯೆ ಮೇ ೧೮ ಕ್ಕೆ ಮುಗಿಯಲಿದ್ದು, ಆ ನಂತರ ವರ್ಗಾವರ್ಗಿ ಪ್ರಕ್ರಿಯೆ ನಡೆಯಲಿದೆ ಎಂದು ಸಚಿವಾಲಯದ ಉನ್ನತ ಮೂಲಗಳು ತಿಳಿಸಿವೆ.

ಸರ್ಕಾರಿ ನೌಕರರ ವರ್ಗಾವಣೆ ಕುರಿತ ನಿಯಮಾವಳಿಗಳನ್ನು ಸಿಬ್ಬಂದಿ ಮತ್ತು ಆಡಳಿತ ಸುಧಾರಣಾ ಇಲಾಖೆ ರೂಪಿಸಿದ್ದು, ಈ ಕುರಿತಾದ ಕಡತಕ್ಕೆ ಮುಖ್ಯಮಂತ್ರಿಯವರ ಅನುಮೋದನೆ ಮಾತ್ರ ಬಾಕಿಯಿದೆ.

ವರ್ಗಾವಣೆ ನಡೆಸಲು ಸರ್ಕಾರ ಈ ಬಾರಿ ಹೆಚ್ಚಿನ ಕಾಲಾವಧಿಯನ್ನು ನಿಗದಿಪಡಿಸಲಿದ್ದು, ನಿಗದಿತ ಸಮಯದಲ್ಲಿ ಸಾಮೂಹಿಕ ವರ್ಗಾವರ್ಗಿ ಪ್ರಕ್ರಿಯೆ ಮುಗಿಸಲು ನಿರ್ಧರಿಸಲಾಗಿದೆ. ಬಹುತೇಕ ಜೂನ್ ಅಂತ್ಯದ ವರೆಗೆ ವರ್ಗಾವಣೆ ನಡೆಯುವ ಸಾಧ್ಯತೆಯಿದೆ.

ಒಟ್ಟಾರೆ ಸರ್ಕಾರಿ ನೌಕರರ ಪೈಕಿ ಶೇ ೫ ರಷ್ಟು ಮೀರದಂತೆ ವರ್ಗಾವಣೆ ನಡೆಸಲು ಹೊಸ ನಿಯಮಾವಳಿಯಂತೆ ಅವಕಾಶವಿದ್ದು, ಈ ಬಾರಿ ವರ್ಗಾವಣೆ ನಡೆಸುವ ಅಧಿಕಾರವನ್ನು ಮಂತ್ರಿಗಳಿಗೆ ನೀಡಲಾಗುತ್ತಿದೆ. ಮಂತ್ರಿಗಳು ಅನುಮೋದನೆಯ ನಂತರ ವರ್ಗಾವಣೆ ನಡೆಯಲಿದೆ.

ಇದೀಗ ವರ್ಗಾವಣೆ ನಡೆಸಲು ಗ್ರಾಮ ಪಂಚಾಯತ್ ಚುನಾವಣೆ ಅಡ್ಡಿಯಾಗಿ ಪರಿಣಮಿಸಿದ್ದು, ಚುನಾವಣೆಯ ನಂತರ ವರ್ಗಾವಣೆಯ ಸುಗ್ಗಿ ಆರಂಭವಾಗಲಿದೆ ಎಂದು ಇದೇ ಮೂಲಗಳು ಹೇಳಿವೆ.